!!!و لما تصحي من اجمل حلم على اسوء كابوس

انا مش عارفه اكتب و اقول ايه اقول ان الدنيا اللي كانت جميله قوي في عيني فجأه دون مقدمات اصبحت بلا طعم ،، مخنوقه قوي مع بكاء لا ينقطع،، هكذا حالتي من الامس .. طبعا كنت في يوم بكلمكم عن قناه الجامعه و اللي دخلت فيها من شهر فبراير ،،،فجأه اتحققت احلامنا فجأه كل واحد حلم يبقي حاجه بقاها اللي كان عايز يبقي مذيع و اللي كان عايز يبقي معد و المخرج و المصور و بتاع المونتاج ،،حلمنا و كنا بنحاول نحقق حلمنا مع بعض ،، اول مره ادخل مكان كل الناس اللي فيه حبو بعض كان اللي يبيقي حزين يجري يروح هناك ينسي كل وجع جواه ،،، اضاءه و ديكور و برامج خارجي و نشره اخبار و فترات مفتوحه كل ده كنا بنعملو طبعا دا كان على النت بس وكان الامل كبييييييييير قوي علشان اللجنة اللي من التليفزيون تيجي و توافق نبقي قناه ارضي و الحلم يبقي حقيقه حلمنا مع بعض حلفنا قسم اننا من نخونش بعض نعمل كل اللي نقدر عليه علشان القناه تبقي حقيقه ملموسه ،،،حتي مدير القناه تخيلو انو اول واحد يشتغل رئيس ليا و مكرهوش و بالرغم انو ممكن يكون فيه حاجات ممكن تزعلني منو لكن مش عارفه ليه ان اي حد كان بيقولي اي كلمه عنو كنت بحس انو بيشتم فيا انا ،،المهم امبارح كنا رايحين القناه عادي يوم اجتماع زي كل يوم اربع و فجأه اقابل صحابي و هم بيقولولي خلاص خلاص الاساس اللي بنيناه اتهد خلاص معدش فيه قناه خلاص كل حاجه حلوه راحت،، مقدرتش اتمالك نفسي زي غيري و المكان اللي كان بيجلجل بضحكنا بقي هو هواه نفس المكان اللي شهد تحطم احلامنا ،، دارت الدنيا بيا ورجعت بيا لاول يوم دخلت القناه و اول مره اقف في مقابله علشان يعرفو قدراتي ،،مش قادره انسي اول مره خرجت فيها علشان اسجل البرنامج بتاعي ، مش قادره انسي اول مره اعمل فيها فتره مفتوحه و قد ايه كنت مرعوبه بس من اول ما بدأت الكلام و انا بنطلق و محدش بيقفني ،،، مش قادره انسي صحابي اللي الدموع ملت عينيهم من كتر همهم ،،، مش هقدر حلم السنين اللي في لحظه بقي حقيقه و في ثانيه ضيعو قرار ظالم،،،عمري مهقدر انسي ان المكان دا خلاني احب حياتي قوي و لم ناس كتيييير على حلم واحد،، اكيد ربنا له حكمه في ده و عارفه انو اكيد مش بيعمل حاجه وحشه لكن اللي مش قادره اعملو انو اوقف نفسي عن التفكير

بجد استفدت قوي بجد الناس كلها كنت بحبها بجد مش هقدر انساكم علشان انتو اللي شاركتوني الحلم و انتو اللي شاركتوني الكابوس عمري ما هنسي اليوم ده 29/8/2007

بقينا في زمن المسخ

امبارح و اخيرا بعد طول انتظار و بعد سنه يمكن و نص .. ساعدني القدر اني اتفرج علي الفيلم اللي انا بعتبروا فيلم واقعي مأساوي صريح من الاخر تحفه .. فيلم عماره يعقوبيان يمكن ناس كتير اعترضت على الفيلم ده و على المشاهد المحرجه اللي جواه لكن الحمد لله اتفرجت عليه في قناه بتحذف كل هذه المشاهد السيئه .. بجد من اول لقطه في الفيلم قعدت مركزه جدا في كل حرف قد ايه الشخصيات مرسومه صح و بعدين تقريبا الكاتب عامل حصر باهم القضايا اللي بنتعرضلها و بتمر علنا في حياتنا علشان يجمعها كلها في بيت واحد موجود اساسا في الحقيقه و شاهد على عصور مختلفه ..انا طبعا مش ناقده لكن انا حسييت ان كل واحد مرنحوت عليه الشخصيه و كأنها اساسا شخصيتو هو من اول عادل امام حتي سعيد الصالح اللي مأخدش الا مثلا مشهد واحد في الفيلم .. اساسا العبقريه انك تقدر تجمع كل هؤلاء النجوم في عمل واحد

انا بردو حديثي مش علي العمل الدرامي لكن هقول اربع مشاهد عجبوني قوي

اولاًً: مشهد المظاهره بتاعت الجامعه

ثانياً: مشهد تعذيب طه او محمد ابن عادل امام

ثالثأ: مشهد عادل امام و هو ماشي في الشارع هو و هند صبري

و اجمل مشهد شوفتو لقطه جايبه العماره من تحت لفوق حسستني بشموخ المبني و روعتو

اما لو اتكلمت عن الاحداث و الشخصيات ..عجبني قوي كللمت عادل امام لما قال احنا بقينا في زمن المسخ .. حسيت دا قوي و انا بتفرج علي يعقوبيان اولا لان كل الشخصيات بتعيش بزدواجيه يعني نور الشريف الراجل اللي ماسك السبحه في ايدو بيتاجر في المخدرات و بيموت ابنو مع نوع خاص من الانانيه الا محدوده و طبعا ابنو نفس الشئ .. عادل امام بالرغم من اخطاؤه الفادحه الا انو من جواه شخص نفسو يبقي نظيف و مش قادر مثلا ياذي اختو بالرغم من تطاولها عليه حاتم رشيد او خالد الصاوي و بصراحه انا بحيه جدا لانو عرف يلعب الدور و انا صدقتو و انا اسفه اني اقول اتعاطفت مع حالتو لان الاف الاطفال اللي بيحصلهم كده و هم صغيرين و بعدين نرجع نعتب عليهم اه مبدؤه مرفوض لكن انا حسيت ان لو حد كان اخد بأيدو كان هيبقي كويس بالرغم من قسوه الظروف عليه و هو صغير و حسيت انو طيب بالرغم من انو شخصيه شاذه الا انو في المجتمع شخصيه ناجحه جدا و رئيس تحرير جرنال فرنساوي يحترم القارئ.. اما طه و دا من الشخصيات اللي دخلت لاقلبي جدا ابن حارس العقار و اللي مشي في سكه مكنش قدها و فهم الدين غلط و حقيقي محمد عمل شغل جامد قوي خصوصا مشهد التعذيب

عباس ابو الحسن ظابط البوليس المسؤل عن التعذيب و طبعا كتير عملوا الدور ده و بردو ادوه ببراعه منهم سعيد عبد الغني في احنا بتوع الاتوبيس

خالد صالح عضو المجلس الل يقدر يخلي الهروين بدره عربيات بقدره قادر.. هندصبري و اللي جواها كويس بس الظروف خلتها تتخلي عن مبادئها .. كل شخصيه فيها اتنين ككل البشر الجانب الكويس و الجانب السئ يعني كلو بوشين علشان كده انا عجبني قوي مشهد عادل امام و هو بيقول بقينا في زمن المسخ زمن غير محدد المعالم اللي اخت فيه بتبيع اخوها و عادي و اللي الاب فيه يقتل ابنو و اللي الراجل يتنازل عن عرضو علشان شويه فلوس فعلا زمن مسخ ... انا فعلا عجبني العمل كمجمل برافو اننا نقدر نرصد واقعنا بالشكل ده