يوم التكريم

صباحكم فل يا كل صحابي ،، معلش بقالي كتير مكتبتش لاني و زي ما انتو عارفين فكره مدونتي قايمه علي الرومانسيه و الفرفشه و الحاجات اللذيذه فيعني بحاول اني مكتبش اي حاجه ،، انا انهارده هكلمكم عن يوم انا بجد كنت فرحانه فيه قوي ،، الاول للي ميعرفش ان عندنا في المنصوره افتتحوا اول محطه راديو و تليفزيون للجامعه و سموها muc او قناه جامعه المنصورة

انا طبعا اول ما عرفت يعني مش عايزه اؤلوكم انا عملت ايه اتهبلت و رحت قدمت فورا لاني و كل اصحابي عارفين ده هوايتي الالي و الاخيره اني ابقي مذيعه بالرغم عن الظروف ،، و مش هطول عليكم غير اني اقولكم اني عملت برنامج في التليفزون و واحد اخوه في الراديو و قارئه نشره في التليفزون و استطرادا انا انا مبحبش الا النشره بحس فيها بقوه فظيعه و بحس اني متميزه فيها بشهاده الناس اللي يعرفوني و الجميل فيها انها غير شخصيتي المهرجه خالص ،، المهم بقي اللي انا كنت هحكيلكم عنو هو يوم التكريم ،، دا يوم كان لكل العاملين بالقناه يعني حبه تحفيز و بما اني من اعضاء القناه فكان لي نصيب من التكريم،،، كان يوم 12 /5/2007 يعني من يومين اولا انا كان نفسي الدنيا كلها تحضر بس كانو محددين 2 او 3 بس اللي يجو ،، كلمت اصحابي في الشغل علشان هيبقي معاهم كرنيهات و رحت انا و ماما و زوجه خالي و بنت خالي و بنت خالتي ،، و صلت للقاعه 7 و نص زي مكان مقرر ان الحفله تبدأ و قعدت استني ان حد يعبرني من صحابي و زميلي ،، لا حياه لمن تنادي بالرغم اني مكلماهم نافر نافر بس ،، و فجأه ظهر زميلي العزيز هاني شيحه و هو حالق راسو ظلبطه طبعا في البدايه انا شبهت عليه لكن فجأه عرفتو دا بعد طبعا مكلمني و لولا كده كنت هقعد طول الحفله اشبه ،،، تقريبا كان بيحتفل بيا بس على طريقتو ،، ابن حلال اخيرا واحد عبرني ،، و بعدها جاءت غاده مصطحبه ابنه خالتها سمر و قعدو في اخر بنش و اتفقنا يصيتوني مهو مش يوم عادي ،، و الحفله بدات 9 و نص يعني بعد ساعتين من الميعاد ،، اه نسيت اقول ان محمد خطيبي كان في مصر فكان مش نافع يجي اما الباقي ففي واحد كان في دمياط و التاني كان مسافر مصر و مكنوش عرفين يجو بس الحمد لله اللي كانو موجودين كانو كفايه يعني سدو ،،،و جاءت لحظه التكريم ،،، ان ااان تش امل ممدوح وافي ،، يارب يارب حد ينطق ايه ده لقيت تسقيف حاد يصحبه بعض الصفافير و صوت ياتيني من اخر بنش كل دي جمايل و دا كان صوت هاني اللي كان حالق زلبطه زي مقلتلكم ياريتو منطق بس و الله كتر خيرهم و بعدها بلحظات لقيته غاده و الشله اللي هي مكنتش موجودهه اساسا استاذنو علشان يمشوا مهما قاموا بالواجب اهو ،، كان نفسي يقعدو شويه بس معلش كتر خيرهم ،، بعد التكريم كانت الحفله ،، يا قد ايه كانت جامده تخيلوا كل الشباب فرحان بحاجه بجد بتاعتنا و اتكرمنا عليها قعدوا يرقصوا و يصفروا و يظغرطوا و الكل كان واقف ،، و طبعا انا كمنت المفروض العاقله اللي فيهم و دا مش عقل مني اني مقمتش معاهم لكن نظرا لوجود قطبين من العائله و هما مرات خالي و ماما فطررت اسفه اني اقعد زي اللي انا قاعده عليه يعني كان الامر ميخلاش من بعض التسفيق علي انغام الموسيقي و اصوات اصحابنا في القناه و بعدين و بعدين اه نجوي بنت خلتي نظرا لانها اساسا بتنام من تسعه بالليل و الساعه دلوقتي 11 و حبه فتزحلقت في الكرسي و نامت و مرات خالي الحقيقه كانت هتموت علشان تتفرج علي المسلسل اصلها متابع جيد جدا للمسلسلات اما ماما فكان الوضع مختلف كانت عايزه تقوم علشان بابا ميقعدش لوحدو و انا و ندي بقي عيزين نقعد علشان بصراحه كانت حفله جامده

بس رضخت في النهايه للاوامر و مشينا من الحفل و انا حامله في يد شهاده التقدير و في اليد التانيه مانجشه في مرات خالي و عقلي مبطلش يقول ،، قد ايه انا فعلا بحب المهنه دي قوي و لو رجع بيا الزمن تاني بردو هتمني ابقي مذيعه

نسيت اقولكم اني و لا واحد من التحف اللي كانو موجودين صورني

حسبي الله و نعم و الوكيل