اولا كل سنه و كل صحابي طيبين و بخير و يارب يكونوا قضوا العيد بخير و يكون الكحك معملش اي مشاكل و ميكونش في زيادات في الاوزان،، ثانيا بقي بتمني ان كل واحد يكون خرج من رمضان بحاجه جديدة

تعالو بينا نحكي تجاربنا مع رمضان هل رمضان السنه دي كان مختلف و لا زي اي رمضان تعالو مل واحد فينا يقول التجربه

و بما اني انا اللي بقترح فانا هقول الاول

طبعا بعيدا عن صلاه الفجر و التراويح الحمد لله المصحف خلصتو مره و نص طبعا ادائي قل لاني كنت بخلصو بالاربع مرات ..الحقيقه رمضان مر بسرعه قوي و الواحد ما بيلحقش يعمل كل اللي هو عايزه في مجرد شهر،، طبعا بقي لو اتكلمنا على رمضان في مش هننسى ابدا المسلسلات و اللي كانو ازيد من اربعين مسلسل،، انا تابعت يتربي في عزو و قضيه رأي عام كفايه جدا

ليله الوقفه كانت جميله قوي السنه دي فجأه تعبت و جبولي الدكتور و على رأي عادل اما مديلو حقنه كبيره و الله كانت بشعه و بالتالي مصلتش صلاه العيد طبعا حاجه بيخه جدا خصوصا ان العيد ميبقاش عيد من غير صلاته .. لكن من الملاحظ و اكتر حاجه كانت معانا على طول في رمضان اننا مش بنسمع اغاني و قنوات الاغاني طبعا متشاله و بدلها كانت قنوات الرساله و المجد و العفاسي لكن و الله بعد فطار يوم 30 كانت زووم و ميلودي و روتانا موسيقى منورين و طبعا بعد مقاطعتنا الكامله للاغاني اهو بنسمع دلوقتي من اربع لخمس ساعات في اليوم

نفسي اعرف بجد بعد كل واحد ما يحكي تجربتو خرج من رمضان بايه .. انا عن نفسي دعيت كتير و يارب الدعاوي دي تكون من نصيبي لكن بردو زعلانه من نفسي في حاجات مقدرتش ابطلها .. يارب يبلغنا رمضان الجاي علشان يمكن نتوب للابد