لما يقوم من نومو مين يناولوا هدومو
هاي عليكم يا جدعان و يا جدعات يا صحابي طبعا و نظرا للاقبال المتزايد علي البلوج بتاعي(بتريق طبع)انا قررت اني اكتب تاني بمعدل زماااااااااااااااااااان لو كنتو فاكرين ..................ما علينا المهم انهارده انا اخترت العنوان ده علشان انا اول ما بسمع الاغنيه دي بتستفزني الجمله دي هو ايه لما يقوم من نومو مين يناولو هدومو ايه التواكل ده هي حتي هدومو مش عارف يناولها لنفسو غريبه قوي.. انا هتكلم انهارده عن الاعتماد علي النفس كام واحد فينا فعلا اما بيصحي من نومو بيتحضرلوا الفطار و يلاقي هدومو مكويه و جذمتو متلمعه و هو مبيعملش حاجه غير انو يصحي من النوم دا اساسا لو صحي .. كام واحد فينا عندو ماما نونا في البيت او حتي بابا جوز ماما نونا اللي بيدلع كده ..تخيلوا معايا لو طفل من و هو صغير مثلا مامتو بتعاملو كده و بعدين يدخل الجامعه ماما هي اللي تجيبلوا الهدوم و تشتريلو الكتب و تبقي تحفه بقي لو كانت زي خالتي فرنسا و تجيبلوا المطوي و السجاير و ازاه البيره..لا حقيقي لو فعلا واحد او واحده كل ده بتعملهم هل فعلا لو فقدوا اهللهم او بعدوا عنهم هيعتمدوا علي نفسهم .. انا بتهيئلي انها بتعتمد علي الشخصيه بطبعا هل هي توكليه او لا فيعني لو الشخص او الشخصه اللي بنتكلم عنهم دول اهلهم سابوهم عنهم حاله من اتنين يا اما ينتحروا و ده الارجح يا اما يتلطموا و بعدين يطلع عليهم القديم و الجديد و بعد اما يعرفوا ان الله حق يقرروا ان لو جالهم ولاد يقطعوا عنهم المصروف علي راي اخونا سعيد صالح و ميربهومش علي التوكاليه .. بس اكتر حاجه فعلا بلاحظها برغم الدلع ان في ناس بيبقي بطبعها مبتحبش ده انا واحده منهم بس للاسف اهليهم بيجبروهم علي التواكل كل حاجه بيخلصوها طيب ادونا الفرصه نثبت ان احنا نقدر لكن للاسف الجواب دايما محبط احنا عارفين الحاجه كويس انتو لسه صغيرين مش عارفين
طب يا اخونا لو فضلنا كده صغيرين امتي بقي هنكبر و نعتمد علي نفسنا
تعالوا نناقش الموضوع ده مع بعض و نسأل هل انت من الاشخاص اللي بتحب التوكل و اللا التواكل و هل فعلا بابا و ماما بيأثروا بالسلب عليكك ؟؟؟؟
10 comments:
ازيك يامولة ..وحشانى موووت
المهم بالنسبة للاعتماد على النفس ..أحب اقلك أنى عمر ما حد حضر لى اى حاجة ، ومن وأنا صغيرة باعتمدعلى نفسي فى كل حاجة فى الاكل والشرب واللبس وحتى ترتيب الحجرة والسرير ، وعمر والدتى ما عملت لى حاجة وكنت اكره حديعمل لى حاجة
أما بقى لو عايزه نموذج على التواكل ، اختى اكبر نموذج ممكن تكون حاطةرجل على رجل وتقول اكلونى شربونى ، وايديها في المياه المثلجة ، ومش بتعمل غير أنها بتذاكر حتى بعدما دخلت الجامعة طول الاجازة مش عملت حاجة
اقولك دي ممكن مش تاكل عشان مش تغسل الطبق ..ايه رأيك بقى؟؟؟
طب ليه متاكل وتسيبلك الطبق مهو هو ده الللي ناقص الله يكون في عونك بس بجد ايه اللي خلا فيه فرق بينكم كده
والله الحكاية دى انا مش متأكد انها ظاهرة
مع انها موجودة بس مش حاسس انها بالإنتشار الكبير ده
لكن انا عايز اتكلم فى موضوع اهم من كده
تأثير المسلسلات علينا اللى واضح انه كبير جدا جدا
يعنى موضوعك جبتى فكرته من مسلسل غير الأسامى اللى ساعات بنطلعها على بعض
او الإفيهات اللى ممكن نعلق بيها احيانا
حتى ممكن عرض فيلم او مسلسل يعمل أزمة
مش عارف ليه الناس بتتأثر بالشكل الكبير ده ومش فى مصر بس لا فى دول كتيرة اوى
انا عموما مش متأثر بحاجة لأنى طول رمضان ما شوفتش أى حاجة :)
وحشتينى يا أمول معلش بقالى فترة طويلة مش عارفة ادخل على اى بلوج بس أنا رجعت تانى ، اما بقى ياستى بخصوص موضوع التواكل على حد ده انتى طبعا عارفانى كويس وعارفة ان الوالدة الحقيقة قامت بدور كبير فى الموضوع ده لأنها طول عمرها بتعلمنا نعتمد على نفسنا من واحنا صغيريين . بس بصراحة انا حسيت بقيمة الموضوع ده اوى لما اتجوزت خصوصا ان جوزى مامته كانت مدلعاه على الأخر يعنى كانت بتعمله كل حاجة بصراحة انا بقيت بتفرز وطلعت عينه وهو طلع عينى لحد اما بطل شوية الموضوع ده ياريت كل الأهالى يعلموا اولادهم الأعتماد على النفس هيفيدهم كتير.
بد انا اكتر واحده كانت بتعجبني في الموضوع ده مامتك و كنت اتمني ان مامتي تبقي كده لا نعمل ايه دا مقدر و مكتوب
khokha
بصى يا اخت امل انا من النوع اللى مش بيحب الدلع الزايد عن حدةيعنى لما اتجوز مثلا و اجيب اولاد اذا كان ربنا رايد ممكن اة يدلعوا على ماما و يطلبوا حاجات اة دة عادى جدا جدا اولادى باة بس مش هحب يتعلموا الاستهتارو كل حاجة يطلبوها انا كدة ببوظهم و في المسلسل (حمادة عزو ) مثلا انا مكنتش بتفرج علية علشان حاسة انى كنت هتشل لو شفتة من الاستهتار و الدلع الزايد اللى كان (حمادة ) فية
واة باة لو كان ابوهم كدة هيبأة عشيته هوة و عيالة سودا
شكرا
ههههههههههه يسلام علي النيه الخير يا خوخا
والله يا علا م عارف لك انتي والأمل.. بجد عليكم شوية أخطاء املائية تخنق
ببقى عايز افهم قصدكم ايه بحتار
عالعموم..
انا افضل الاعتماد على واحد بس
طبعا عارفاه يا امل.. بس الكارثه انه كسلان جدا بطبيعته.. يلا مش مهم كفاية انه موجود جمبي وخلاص.
ههههههههههههههههههههه
ههههههههههههههههههههه
وبعدين كل البشر كسالى بطبعهم.. بالذات اليومين دول، شكلها عدوى وأصابت كل الناس.. عادي بقى
الموضوع اصلة تحديد المهام هناك مهام داخل البيت ومهام خارجة
وكل واحد يعمل ما يراه مناسبا لطبيعته
يعنى لو دققنا سنجد الموضوع متوزان لوحدة
ازيك يا اموله
ايه البوستات الجامده
بس بجد انا عن نفسي مش بحب التواكل ابداً على حد أحب اعمل كل حاجتي بنفسي ساعد نفسك بنفسك يعني
بس برده احب اساعد جدا
عارفه إحساس ان يبئى حد مسؤل منك او انك متوليه كل شئونه انا بصراحه مجربتش الاحساس ده قبل كده بس حساه حلو او على الاقل لحد دلوقتي حساه حلو مش عارفه لو اتحطيت فيه هيفضل حلو ولا هيقلب اما بئى على الجانب الاخر لو لئيت حد يعملي كل حاجه وفطار وغدا وعشا ولبس وكله أكيد أكيد يعني مش هقول لأ اللي يلاقي دلع ومايدلعش يبئى حرام عليه
ههههههههه
ولا ايه
Post a Comment